Hallo Vriende

Vandag was 'n heerlike dag met net genoeg wolke om die son 'n bietjie te verdof.

Ek en Hannelore het vroeg iets by Probst gaan een vir ontbyt en toe ander besigheid gedoen.  Sy soek
'n telefoonboek en kan jy glo, in die hele Walvisbaai se poskantoor en Telecom is daar nie een te vinde nie.  Dis blykbaar weggesluit in 'n stoor.  Ek wonder of hulle die sleutel verloor het?  Maar sy sit nog steeds sonder 'n telefoonboek.

Verder het ons gou by die plaaslike koerant se kantore gister se koerant gaan koop want daar was 'n foto van Renate in en gister het ek die koerant misgeloop by die verkeersligte.  Ek dink ek was te laat.  Hier is deesdae soveel mense dat as jy nie vroeg spring nie, is jy dit kwyt.  Dit werk in die winkels ook so.  Hulle pak elke dag voorraad uit, maar as jy middagtyd daar kom is die rakke leeg.Ek dink ons het nog 'n Spar of Pick 'n Pay nodig.  Die winkels wat ons hier het, kan nie meer aan die inwoners se behoeftes voorsien nie.  Dis uiters ongemaklik.  Jy moet letterlik al 8 uur in die winkel wees en dan is die brood en broodrolletjies nog nie klaar gebak nie en moet jy later nog 'n keer gaan.

More gaan ek en Hannelore met ons Spaanse vriendin uiteet by een van die beste restaurante op die dorp.  Ek sien baie daarna uit.  Sy was nou vir 2 maande in Spanje en het seker baie om ons te vertel.  Volgende week gaan sy al weer Engeland toe om by haar seun en sy gesin te gaan kuier.  On moes dus mooi kyk om 'n datum  vir die ete te kry wat ons al 3 pas.

Julle moet 'n lekker aand he

Groetnis
Theresa